Anamarciana, como o seu mesmo nome indica, vive no espacio, a moitos miles ou millóns de anos do noso planeta, nun sistema cheo de planetas de cores, redondos coma balóns. Anamarciana vive no planeta quintodereita do sistema bisolar, xunto coa súa vaca espacial Lolaescaiflai. Vive co seu irmán, Nanomarciano, e a súa nai Adelamarciana, dona dun negocio de exportación de asteroides de chocolate, quen pasa parte do día recolléndoos no seu aerotractor. Pero tamén alí, as rapazas teñen que axudar levando o gando a pastar entre as estrelas e ir á escola e facer excursións desde o Sistema Alfa-Bético ata o Sistema Decimal. Anamarciana é a primeira entrega desta serie de ciencia ficcción para os primeiros lectores, escrita e ilustrada por Alberto Varela Ferreira, onde a ilustración infográfica destaca pola súa orixinalidade e pola súa capacidade para suxerir espacios de ciencia ficción.